ಬೆಳಗಾವಿ ಅರಣ್ಯ ವಲಯದ 7 ಜಲಪಾತ ವೀಕ್ಷಣೆಗೆ ಇನ್ನೊಂದು ತಿಂಗಳಲ್ಲಿ ಪರಿಸರ ಸ್ನೇಹಿ ಇಕೋ ಟೂರಿಸಂ ಅವಕಾಶ : ಜಿಲ್ಲಾಧಿಕಾರಿ ಮೊಹಮ್ಮದ ರೋಷನ್
ಅಸ್ಮಿತೆ ವರದಿ, ಜು.08: ವಿಶ್ವವಿಖ್ಯಾತ ಗೋಕಾಕ ಜಲಪಾತ, ಗೊಡಚಿನಮಲ್ಕಿ, ಖಾನಾಪೂರ ತಾಲೂಕಿನಲ್ಲಿ ಕಳಸಾ ಬಂಡೂರಿ ನಾಲಾ ವ್ಯಾಪ್ತಿಯ ಚಿಕಲೆ, ಭೀಮಗಡ ಜಲಪಾತಗಳು ಸೇರಿದಂತೆ ಗಡಿಭಾಗದಲ್ಲಿನ ಮಹಾರಾಷ್ಟ್ರದಲ್ಲಿರುವ ಜಲಪಾತಗಳು ಸೇರಿದಂತೆ 7 ಜಲಪಾತಗಳ ವೀಕ್ಷಣೆಗೆ ಇನ್ನು ಒಂದು ತಿಂಗಳಲ್ಲಿ ಪರಿಸರ ಸ್ನೇಹಿ ಇಕೋ ಟೂರಿಸಂ ಅನುಕೂಲತೆಯನ್ನು ಜಾರಿಗೊಳಿಸಲಾಗುವುದು ಎಂದು ಬೆಳಗಾವಿ ಜಿಲ್ಲಾ ಪ್ರವಾಸೋದ್ಯಮ ಪ್ರಾಧಿಕಾರದ ಅಧ್ಯಕ್ಷರೂ ಆದ ಜಿಲ್ಲಾಧಿಕಾರಿ ಮೊಹಮ್ಮದ ರೋಷನ್ ತಿಳಿಸಿದ್ದಾರೆ.
ದೂರದರ್ಶನ ಹಾಗೂ ಆಕಾಶವಾಣಿಗೆ ಈ ಬಗ್ಗೆ ಮಾಹಿತಿ ನೀಡಿರುವ ಅವರು, ಪ್ರತಿ ಮಳೆಗಾಲದಲ್ಲಿ ಪ್ರವಾಸಿಗರ ಸುರಕ್ಷತೆ ಹಾಗೂ ಪರಿಸರ ಹಿತರಕ್ಷಣೆಯ ದೃಷ್ಟಿಯಿಂದ ಬೆಳಗಾವಿ ಅರಣ್ಯ ಪ್ರವೇಶ ಹಾಗೂ ಜಲಪಾತಗಳಿಗೆ ತೆರಳುವುದನ್ನು ನಿಷೇಧಿಸಲಾಗುತ್ತದೆ. ಆದರೆ, ಪಶ್ಚಿಮ ಘಟ್ಟ ಪ್ರಾಕೃತಿಕ ರಮ್ಯೆತೆ ಹಾಗೂ ಜಲಪಾತಗಳ ಮನಮೋಹಕತೆಯನ್ನು ಪ್ರವಾಸಿಗರು ಮಳೆಗಾಲದಲ್ಲಿಯೇ ವೀಕ್ಷಿಸಬೇಕಾಗುತ್ತದೆ. ಪ್ರವಾಸಿಗರ ಈ ಅಭಿಲಾಷೆಯನ್ನು ಈಡೇರಿಸುವ ಉದ್ಧೇಶದಿಂದ ಇಕೋ ಟೂರಿಸಂ ಜಾರಿಗೊಳಿಸಿ ನಿರ್ಧಿಷ್ಟ ಸಂಖ್ಯೆಯ ವೀಕ್ಷಕರ ಗುಂಪುಗಳ ಮೂಲಕ ಅವಕಾಶ ಕಲ್ಪಿಸಲು ಉದ್ದೇಶಿಸಲಾಗಿದೆ. ಸದ್ಯದಲ್ಲಿಯೇ ಪ್ರವಾಸೋದ್ಯಮ ಇಲಾಖೆಯ ಅಧಿಕಾರಿಗಳು ಹಾಗೂ ಇತರ ಸದಸ್ಯರೊಂದಿಗೆ ಸಭೆ ನಡೆಸಿ ಸೂಕ್ತ ಮಾರ್ಗ ಸೂಚಿ (ರೋಡ್ ಮ್ಯಾಪ್ ) ಸಿದ್ಧಗೊಳಿಸಲಾಗುವುದು. ನಾಳೆ ಬೆಳಗಾವಿಗೆ ಆಗಮಿಸಲಿರುವ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ ಅವರ ಗಮನಕ್ಕೆ ತಂದು ಕ್ರಮಕೈಗೊಳ್ಳಲಾಗುವುದು ಎಂದು ಹೇಳಿದ್ದಾರೆ.
ಪ್ರಾಕೃತಿ ಸೌಂದರ್ಯ: ಪಶ್ಚಿಮ ಘಟ್ಟದ ಸೆರಗಿನ ಅಂಚಿನಲ್ಲಿರುವ ಬೆಳಗಾವಿ ಹಾಗೂ ನಾಡಿನ ಪ್ರವಾಸಿಗರಿಗೆ ಒಂದು ಸುಂದರವಾದ ಪ್ರಾಕೃತಿಕ ತಾಣವಾಗಿದೆ. ಬೆಳಗಾವಿ ಹಾಗೂ ಖಾನಾಪೂರ ಅರಣ್ಯ ವಲಯ ವೈವಿದ್ಯಮಯ ನಿಸರ್ಗ ಸೌಂದರ್ಯವಿದ್ದು, ಅನೇಕ ಜಲಪಾತಗಳು ಇದಕ್ಕೆ ಕಳಸವಿಟ್ಟಂತೆ ಇವೆ. ಆದರೆ, ವೀಕ್ಷಣೆಗೆ ಹೇಳಿಕೊಳ್ಳುವ ಅನುಕೂಲತೆ ಹಾಗೂ ಸುರಕ್ಷತೆಯ ಕೊರತೆಯಿಂದ ವೀಕ್ಷಣೆಗೆ ಸಾಧ್ಯವಾಗುತ್ತಿಲ್ಲ. ಪ್ರಸ್ತುತ ಜಿಲ್ಲಾಧಿಕಾರಿ ಮೊಹಮ್ಮದ ರೋಷನ್ ಅವರ ಮಹತ್ವಾಕಾಂಕ್ಷೆಯ ಯೋಜನೆ ಪರಿಣಾಮಕಾರಿಯಾಗಿ ಜಾರಿಗೊಂಡರೆ ನಿಸರ್ಗ ಪ್ರಿಯ ಪ್ರವಾಸಿಗರಿಗೆ ಉತ್ತಮ ಅವಕಾಶ ದೊರೆತಂತಾಗುತ್ತದೆ.
ಈ ಲೇಖನ ಹಂಚಿಕೊಳ್ಳಿ
